Rusio: Lando kien oni paketojn ne sendas

Publikigita Marto 26, 2010 de Marek Blahuš

La aŭkcia retejo eBay decidis ne plu akceptadi mendojn de siaj rusiaj klientoj. Kulpas pro tio la Poŝto de Rusio, kiu kolapsas sub la inundo de paketoj kaj leteroj el eksterlando, kies nombro dumjare kreskis je 64 procentoj. Al tiu kresko kontribuis precipe la eksterlandaj interretaj vendejoj kaj aŭkcioj, kiuj laste ekfuroris en Rusio. Similan problemon alfrontas ankaŭ aliaj landoj, precipe en Afriko kaj Suda Ameriko.

Dum antaŭe livero de paketo en Rusion bezonis maksimume du semajnojn, nun tio povas daŭri eĉ du monatojn. La prokraston kaŭzas la dogana kaj sekureca kontroloj. En la centrejo de la Internacia poŝto nun kuŝas 51 mil neprilaboritaj paketoj kaj leteroj. Por plirapidigi la procedon, oni tie nun devos labori 24 horojn tage kaj alpreni pliajn dungitojn. La Poŝto sin defendas asertante, ke neniu anticipe atentigis ilin pri la populariĝo de la interretaj vendoj.

La rusianoj tamen alfrontas la problemon kun humuro, pri kio atestas ankaŭ la plej nova ŝerco: Estraro de la Poŝto de Rusio asertas, ke ĝi ricevis neniujn plendojn pri la kvalito de sia laboro. Verŝajne oni dum la lastaj jaroj ankoraŭ ne sukcesis liveri ilin.

fonto: Lidové noviny

Share on FacebookShare on VKShare on Google+Tweet about this on TwitterShare on RedditShare on LinkedInEmail this to someone

Alia socia reto eblas

Publikigita Oktobro 20, 2009 de slavik

La plej populara rusia socia reto vKontakte (vK) iĝis internacia. Certe jam antaŭe eblis registri sin en ĝi el eksterlando, sed ekde ĉi-oktobro la reto estos reklamata internacie kiel plurlingva sistemo.
Elekto de lingvoj ĉe registriĝoIom simila al Facebook, vKontakte estas pli „facila“ por retumilo (laŭ mia sperto de ne tre fortika komputilo), enhavas malpli da reklamo. La ĉefa funkciaro estas certe pri amikumo: kiuj estas viaj amikoj, al kiaj renkontiĝoj ili iras (kaj ĉu vokas ankaŭ vin), multo estas farata por aktivigi grupan laboron — interalie, rusiaj E-kluboj kaj teamoj de E-eventoj aktive uzas vKontakte por siaj bezonoj.

Socia reto vK estas eble la plej granda mirinda sukceso de ruslingva Interreto: ĝi havas pli ol 40 milionojn da uzantoj kaj funkcias kiel la ĉefa aŭd-vida rethotelo por kelkaj grandaj landoj de eksa Sovetunio. Nur tri jarojn antaŭe vK startis kiel iniciato de kelkaj studentoj de la Peterburga Ŝtata Universitato, kaj lavange populariĝis.

vKontakte jam atingeblas en bona traduko al pli ol dek lingvoj, inter ili la movade gravaj hungara, ĉina, japana, pola, portugala kaj aliaj. Ekde la komenco, tiun ĉi socian reton distingis racia uzo (aŭ ĉu simple neuzo) de crowdsourcing (puŝo de laboro al amasoj de uzantoj). Tio tre pozitive influis la kvaliton.

Vi ne bezonas ŝanĝi vian preferatan socian reton favore al vK tuj aŭ iam, sed certe estas bona kromservo por uzi inter la aliaj. Cetere, vK ebligas senliman interŝanĝon (rememoru Ipernity kaj aliajn) de fotoj kaj filmetoj.

Jen ligo al registriĝo »»»

Post registriĝo nepre trovu la grupon „Esperanto parolata“ (uzu la serĉokampon en la supro de la interfaco) kaj aliĝu (ligilo dekstre sub emblemo). En tiu grupo vi jam nepre trovos multajn Esperantajn konatojn, aktivulojn de E@I kaj TEJO. Ĝis baldaŭaj belaj renkontoj!

Share on FacebookShare on VKShare on Google+Tweet about this on TwitterShare on RedditShare on LinkedInEmail this to someone